Ang Pagong at ang Kuneho

Isang araw, ipinagmalaki ng Kuneho sa ibang mga hayop ang kanyang bilis sa pagtakbo. Pinagtawanan niya ang Pagong dahil sa labis na kabagalan nito sa paglalakad. Upang turuan ng leksyon ang Kuneho, hinamon siya ng Pagong sa isang karera na labis na ikinagulat at ikinatawa ng Kuneho. Nagsimula ang karera at mabilis na humarurot ang Kuneho, na iniwan ang Pagong sa malayo. Dahil sa sobrang kumpyansa na hindi siya matatalo, nagpasya ang Kuneho na magpahinga muna sa ilalim ng isang malabay na puno. Sa sarap ng simoy ng hangin, hindi namalayan ng Kuneho na siya ay nakatulog nang mahimbing. Habang tulog ang Kuneho, patuloy lang ang Pagong sa paglalakad. Kahit mabagal at pagod, hindi siya huminto hanggang sa unti-unti niyang malampasan ang natutulog na Kuneho. Nang magising ang Kuneho, nagmadali siyang tumakbo patungo sa finish line, ngunit laking gulat niya nang makitang nauna na roon ang Pagong. Nanalo ang Pagong sa karera at hiyang-hiya ang Kuneho sa kanyang pagyayabang.